Plejmejkeru Golden Stejt Voriorsa Stefu Kariju potrebne su još dvije trojke kako bi postao igrač sa najviše pogođenih šuteva za tri poena u istoriji NBA lige.
– Uživam u trenutku, kucajući na vrata rekorda. Osjećaj je nerealan. U prethodna tri meča sam naučio da samo treba da nastavim da igram košarku, da šutiram kad mislim da ću pogoditi i da uživam u iskustvu, jer sam dugo ovo čekao – rekao je Kari, koji je šutirao 5-15 za tri u pobjedi Voriorsa nad Pejsersima.
Kari je sad ubacio 2.972 trojke, jednu manje od legendarnog Reja Alena, a sljedeći meč Ratnika jeste sa Njujork Niksima u Medison Skver Gardenu.
– Mislim da u prethodnih nekoliko mečeva previše juri trojke i da će biti olakšanje kada ga obori, i za njega i za tim. Kada ga udvajaju na pik-en-rolu, samo treba da podijeli jednostavno dodavanje, on to zna, ali pokušava da napravi nešto veliko i nesvakidašnje – rekao je trener Voriorsa Stiv Ker.
Krilni centar Drejmond Grin sličnog je mišljenja kao trener Ker.
– Podsvjesno svi želimo da obori rekord. Prije utakmice kažeš sebi da nećeš davati Stefu loptu svaki put, ali u suštini želiš da šutne trojku. Pri tom, to je uvijek dobra opcija… Čuli smo u Indijani kako su ljudi navijali, svi žele da rekord bude oboren, ne samo naši navijači. Svi bi da prisustvuju istoriji. Nadam se da će dati dvije trojke u prvoj četvrtini i da to bude to. Mislim da će na kraju imati 1.000 i više trojki od Alena – kaže Grin.
One Comment