Alegri poslije katastrofe Juvea: Ništa ja tu ne bih mijenjao

Trener Juventusa Masimilijano Alegri insistirao je poslije meča da ne bi promijenio pristup Juventusa, jer je njegov tim “igrao dobro” uprkos katastrofalnom porazu od Viljareala 0:3 u revanš utakmici osmine finala Ligi šampiona.

Igra „Stare dame“ se potpuno raspala u posljednjih 15 minuta kada su Španci postigli tri gola…

– Igrao bih na isti način, momci su dobro radili 65 minuta. Ali Viljareal je sve karte bacio na odbranu i uz sreću prošao dalje. Moramo da prihvatimo ovaj poraz, ružan je, ali ne mogu da se ljutim na igrače, jer su igrali dobro – rekao je Maks Alegri.

Alegri je izgledao iznerviran na nekoga nakon posljednjeg zvižduka, ali kaže da nije bio ljut na trenera Viljareala Unaija Emerija.

– Nisam se ljutio ni na koga. Čestitam Emeriju, to je bila jedna od njegovih uobičajenih utakmica. Ovo je fudbal, nekad stvari idu u tvoju korist, nekad protiv tebe. Dali smo sve od sebe. ali je Viljareal u jednoj fazi imao devetoricu igrača iza lopte i nije čak ni pokušao da parira. Bili smo naivni kod prvog penala, a onda umjesto da preokrenemo rezultat, primili smo još dva gola i izgubili kontrolu nad mečom.

Juventus je treću godinu zaredom ispao iz Lige šampiona u osmini finala. Ovog puta čini se na najbolniji način jer je doživio težak poraz pred svojim navijačima.