ĆAVI ODUSTAO OD LŠ I dalje imamo domaća takmičenja
Fudbaleri Barselone nalaze se pred eliminacijom iz Lige šampiona.
Katalonci su osvojili samo bod protiv Intera (3:3) pa dva kola prije kraja imaju tri boda manje od “nerazura”, koji su bolji u međusobnom dvomeču.
Ukoliko Inter u sljedećem kolu savlada autsajdera Viktoriju u Plzenju, “blaugrana” će morati da se zadovolji proljećem u Ligi Evrope, opet.
– Pravili smo greške kakve ne smijemo da priuštimo u ovakvom takmičenju. Sada moramo da se oslanjamo na vjeru i karakter kako bismo se vratili u borbu. Nismo pokazali najbolju verziju sebe u LŠ, ali i dalje imamo nacionalno prvenstvo, Kup i Superkup. Sezona je duga, a naše taktičke ideje su dobre – rekao je trener Barse Ćavi Ernandes nakon utakmice.
Ćavi je govorio o greškama koje je njegova ekipa pravila.
– U drugom poluvremenu nam je pao intenzitet. Neću izdvajati igrače jer smo mi prije svega tim. Ako Pike, Buskets, Pedri ili Dembele prave greške, onda sam ja za to kriv – rekao je trener Barselone.
Barselona u sljedećem kolu igra protiv Bajerna u Minhenu.
