NA VIDIKU BROJ 400 Do kada je Đokoviću garantovano mjesto broj 1?

Poslije odustajanja Karlosa Alkaraza od mastersa u Monte Karlu zbog povrede, Novaku Đokoviću obezbijeđen je dodatni period na mjestu broj jedan ATP liste.

Đoković je već rekorder po broju sedmica na prestolu, trenutno broji svoju 381. nedjelju, a sada je matematički nemoguće da taj broj bude ispod 385.

Skoro nezamislivo je i da će biti manji od 387 sedmica, pošto bi za to bilo potrebno da Danil Medvedev osvoji Barselonu, Monte Karlo i Madrid, na svojoj najslabijoj podlozi šljaci.

S obzirom na to da je već rekorder, Novak se sada trka sa sobom, a kad je već tako, broj 400 djeluje kao fin jubilej…

Đoković je već nekoliko dana u Monte Karlu, gdje se sprema za turnir koji počinje 9. aprila.

Novak je u Kneževini dosad dvaput slavio (2013, 2015), a sada ima priliku da zaradi još bodova, jer je prošle godine ispao u svom prvom meču od Alehandra Davidoviča Fokine.

Osim Alkaraza, učešće u Monte Karlu otkazali su Rafael Nadal, Feliks Ože-Alijasim, Pablo Karenjo Busta i Denis Šapovalov, a u glavni žreb upao je Laslo Đere.