LJETNA ŠEMA: Zaniolo i Juventus?

Gazeta delo Sport piše da je Juventus već skovao prvi plan za ljetnji prelazni rok i tiče se – Nikola Zaniola. Italijanski vezista nikako ne uspijeva da se dogovori sa Romom oko produžetka ugovora. Prema ranijim saznanjima lokalnog Il Tempa, Zaniolo umjesto trenutna 2.500.000 evra traži okruglo 6.000.000 evra, zbog čega pregovori dvije strane stagniraju već neko vrijeme.

Milanski list u daljem tekstu podsjeća da je 22-godišnji Italijan navijač Bjankonera još od malih nogu, a posebnu pažnju privukli su i Zaniolovi “lajkovi” na slikama nekolicine Juventusovih igrača na Instagramu.

Ipak, operacija neće biti tako jednostavna. Juventus prvo mora da riješi pitanje sudbine Paula Dibale. Argentinac ima poprilično dobru sezonu iza sebe, ali se prečesto povrijeđuje, zbog čega su na Alijanc stadionu u dilemi da li vrijedi ispuniti finansijske zahtjeve igrača koji dobar dio sezone provodi van terena.